Талдықорғанда «Жырлайды жүрек» атты челлендж қорытындыланды. Қазақ поэзиясының көрнекті өкілі Мұқағали Мақатаевтың 90 жылдық мерейтойына орай өткен эстафетаны облыстық білім және ғылым қызметкерлерінің кәсіподақ ұйымы ұйымдастырды. Әдеби шараны жетісулық 200-ге тарта кәсіподақ мүшесі қолдады. Яғни, аймақ ұстаздары ақпан айының 1-і мен 9-ы аралығында мұзбалақ ақынның шығармаларын орындады. Олар аталған әдеби челленджді әлеуметтік желіде онлайн өткізді. Нәтижесінде төрт жас маман марапатталды. Жеңімпаздарға ұйым тарапынан алғыс хатпен М.Мақатаевтың шығармалары жинақталған кітабы табысталды.
