Заң бәріне ортақ. Талдықорғанда жол ережелерін елемейтіндермен күрес басталды. Әсіресе шаһардың орталық көшелерінде көліктерін бейберекет қойып, тіпті белгіленбеген жерлерге қалдырып кететіндер заң жүзінде жазаланбақ. Бүгіннен бастап жол патрульдік полициясының 7 экипажы осы бағытта жұмыс істемек. Рейд басталған күннен-ақ заңды белшесінен басқандар айыппұл арқалады. Бірер сағаттың ішінде 10 нан аса көлік иесіне хаттама толтырылды. Тағы осынша жүргізушіге ескерту берілді. Сондай-ақ, профилактикалық шара барысында заң түгілі, құқық қорғау органдары қызметкерлерін елемей кеткен азамат та болды. Көліктің мемлекеттік тіркеу нөмірі арқылы мекен-жайы анықталып 2 әкімшілік хаттама толтырылды. Айта кетейік, жыл басынан дәл осы заң бұзушылықтар бойынша 1670 әкімшілік хаттама толтырылған. Өткен жылдың сәйкес кезеңінде бұл көрсеткіш 976 болған.
